Tambwe ‘aanguka’ miaka miwili Yanga

Amissi Tambwe akisaini mkataba mpya Yanga.

Mshambuliaji wa Yanga raia wa Burundi Amissi Tambwe amesaini mkataba wa miaka miwili kuendelea kuitumikia miamba hiyo ya Tanzania kuanzia msimu ujao.

Tambwe alikuwa ni miongoni mwa wachezaji wa Yanga ambao mikataba yao inamalizika mwezi huu, pamoja na wengine wa kigeni kama vile Donald Ngoma na Haruna Niyonzima na kuzusha hofu miongoni mwa wapenzi na mashabiki wa mabingwa hao wa Tanzania Bara.

Awali akizungumzia harakati za usajili za klabu hiyo, Mwenyekiti wa kamati ya usajili Husseini Nyika aliahidi kuwa leo atapakua “kifaa kipya” na kisha ataelekea nje ya nchi ambako atarudi na “kifaa kingine” cha kimataifa.

Kwa kauli hiyo inawezekana Nyika alimaanisha mkataba huo mpya wa Tambwe ndicho “kifaa kipya” na alisisitiza kuwa siku chache zijazo klabu hiyo ambayo ilikuwa kimya kwa muda, itafanya jambo kubwa na la kihistoria katika masuala ya usajili nchini Tanzania.

Source:Azam Tv