Man United Yapata Pigo Baada Ya Beki Wake Luke Shaw Kuvunjika Mguu...

Hii ni habari mbaya kwa mashabiki wa soka wa Manchester United na England kwa ujumla kutokana na kuumia kwa mchezaji wao chipukizi mlinzi wa kushoto, Luke Shaw katika mchezo wa klabu bingwa Ulaya dhidi ya PSV Eindhoven.

Shaw alifanyiwa tackling mbaya na mlinzi Hector Moreno wa PSV katika dakika ya 15 na kubebwa katika machela huku akiwekewa mirija ya hewa puani. Ameumia vibaya mguu wake wa kulia, huku akionekana kuvunjika mara mbili katika mguu mmoja.

Kocha wa Manchester United, Louis Van Gaal amasema kuwa Shaw alikua akilia machozi wakati akipelekwa katika vyumba vya kubadilishia nguo na hivyo akasisitiza ni pigo kwa kijana aliyekua na msimu mbaya mwaka jana, na kuanza vizuri sana msimu huu, na sasa ameumia na anaweza kukaa nje kwa angalau miezi sita.

Wachambuzi wa soka nchini England wameonesha kushangazwa kwao na kitendo cha mwamuzi wa mchezo huyo kutotoa kadi nyekundu kwa Moreno wala penati huku wakiamini ilikua ni rafu mbaya sana.

Watu mbalimbali wa soka na michezo kwa ujumla wakiongozwa na Andy Murray na Gareth Bale wamemtumia meseji za kumtuliza na kumtakia apone haraka kijana huyo mdogo. Gary Lineker, Alan Shearer na Rio Ferdinand wote hawakua nyuma kumtakia heri Shaw.

Aidha mshambuliaji wa zamani wa Liverpool, Real Madrid na Manchester United, Michael Owen alishindwa kuwa sawasawa baada ya tukio hilo wakati akitangaza mpira huo katika channel za BT Sports.

Manchester United sanjari na kucheza vizuri sana, walipoteza mchezo huo kwa goli 2-1. Memphis Depay akiifunga timu yake ya zamani huku Van Gaal akisema kuwa inakera kwa timu yake kutawala mchezo kiasi kile na baadae kufungwa wao.

SOURCE:Shaffihdauda.com