Sikukuu ya eid el hajj kufanyika kitaifa Mkokotoni Wilaya ya Kaskazini Unguja..

Waziri wa Katiba na Sheria Zanzibar Abubakar Khamis Bakar akizungumza na waandishi wa Habari (hawapo pichani) Ofisini kwake Mazizinni, kuhusu Sherehe ya Sikukuu  ya Idd el Hajj  zitakazofanyika siku ya Alkhamis  tarehe 24.9.2015 katika Kijiji cha Mkokotoni  Wilaya ya Kaskazini ‘A’ Unguja.

Waandishi wa Habari wa vyombo mbali mbali wakimsikiliza Waziri wa Katiba na Sheria Aboubakar Khamis Bakar alipokuwa akitoa taarifa ya Sikukuu ya Idd el Hajj itakayofanyika Mkokotoni Wilaya ya Kaskazini Unguja.

WAZIRI  wa Katiba na Sheria Zanzibar Aboubakar Khamis Bakar amewataka wakaazi  wa shehia za Wilaya ya Kaskazini ‘A’ kushiriki kikamilifu  katika  maadhimisho ya sherehe za Idd el Hajj  zitakazofanyika Kitaifa Mkokokotoni. Mkoa wa Kaskazini Unguja.

Akizungumza na waandishi wa Habari Ofisini kwake Mazizini, Waziri Aboubakar amesema kufanyika kwa sherehe za Idd  el Hajj  ndani ya Wilaya za Unguja na Pemba ni kutokana na uwamuzi  wa Rais wa Zanzibar na Mwenyekiti wa Baraza la Mpinduzi Dkt. Ali Muhamed Shein ili wananchi wote wa Wilaya na Mikoa kupata fursa ya kukutana na viongozi  wao wakuu wa kitaifa.

Alisema  sala ya Idd el Hajj itasaliwa katika kiwanja cha Mpira cha Mkokotoni Polisi na Baraza la Idd litafanyika Ukumbi wa Chuo cha Amali.

Waziri Aboubakar  alisema  katika kusherehekea sikukuu hiyo Serikali bado inasisitiza kuendeleza tabia njema ya kulinda heshma  katika jamii ya kizanzibari wakati wote ikiwemo kuvaa nguo za heshma na watoto  kusherehekea sikukuu wakati wa mchana.

Aliagiza   disko toto ni marufuku na muda wa mwisho wa sherehe katika viwanja  vyote vya sikukuu  Unguja na Pemba itakuwa ni saa 4.00 usiku

Aidha Waziri wa Katiba na Sheria  amepiga marufuku aina yoyote ya disko kupigwa katika viwanja vya wazi pahala popote na disko zinazoruhusiwa ni zile zitakazopigwa katika kumbi zilizoruhusiwa kwa mujibu wa sheria  na taratibu zilizowekwa na  Baraza la sanaa,

Aliwaomba wazazi kuacha tabia ya kuwaruhusu watoto wadogo kwenda katika  viwanja vya sherehe wakiwa peke yao ama kuwafuatanisha na watoto wenzao  kwani  kufanya hivyo kunaweza kutoa nafasi ya kutokea uhalifu na udhalilishaji wa watoto hao.

Mwaka jana maadhimisho ya sherehe za Idd el Hajj zilifanyika  katika kijiji cha Micheweni Wilaya ya Micheweni Mkoa wa Kaskazini Pemba.

SOURCE:ZanziNews