Mabasi ya Muro yafungiwa kutoa huduma..

Dar es Salaam. Mamlaka ya  Udhibiti Usafiri wa Nchi Kavu na Majini (Sumatra) imeyafungia mabasi ya Muro chini ya Kampuni ya Muro Investment kutoendelea na  safari zake za Dar-Mwanza na Dar-Arusha kutokana na kukiuka sheria za usalama na usafirishaji.

Uamuzi huo umekuja baada ya kuwepo kwa mfululizo wa malalamiko juu ya huduma zisizoridhisha za mabasi hayo kutoka kwa wananchi.

Barua ya Sumatra kwa kampuni hiyo juu ya uamuzi huo inasema katika mojawapo ya safari zake, basi la kampuni hiyo likitoka Dar es Salaam kwenda Arusha, liliharibika eneo la Chalinze majira ya saa tatu asubuhi na hadi kufikia saa sita usiku halikuw alimetengemaa huku abiria wakikosa usafiri mbadala na huduma nyingine za kibinadamu.

“Sumatra ilipokea pia malalamiko ya kutoka kwa abiria juu ya mabasi ya kampuni yako yanayotoa huduma  kwa mikoa ya Dar es Salaam –Arusha na Dar es Salaam –Mwanza kuharibika kwenye maeneo ya Ruvu darajani,Maili Moja na Chalinze kwa nyakati tofauti,” inasema sehemu ya barua hiyo.

“Sumatra imeona huo ni ukiukwaji wa Kanuni namba 21 na 22 ya Kanuni za Leseni za Usafirishaji kwa magari ya abiria ya mwaka 2007 na kanuni namba 11(1)(b) ya viwango vya ubora na usalama ya mwaka 2008.”

Sumatra imeitaka kampuni hiyo kufanyia matengenezo mabasi yake na kukaguliwa na mkaguzi kutoka jeshi la polisi na kutibitisha yanakidhi viwango vya kiufundi na kiusalama.

SOURCE:Mwananchi